ماڵپه‌ڕی کوردستانه‌که‌م رۆحی ئەحمەد Ù„Û•Ú¯Û•Úµ مندایە
نێردراو له‌ لایه‌نPaviel له‌ ڕۆژی June 21 2012 20:19:20
 گولتان كایا، هاوسەری هونەرمەندی كۆچكردووی كورد ئەحمەد كایا، سەرسامە بە ئاستی ژنانی كورد و دەڵێ ژنانی باكوور و باشووری كوردستان "زۆر سیاسین". هەروەها دەڵێ ئەگەر ئەحمەد كایا ئێستا لە ژیاندا بووایە، هەموو گۆرانییەكانی لەسەر ژن دەبوون
سه‌رجه‌م بابه‌ته‌که














رۆحی ئەحمەد لەگەڵ مندایە

گولتان كایا، هاوسەری هونەرمەندی كۆچكردووی كورد ئەحمەد كایا، سەرسامە بە ئاستی ژنانی كورد و دەڵێ ژنانی باكوور و باشووری كوردستان "زۆر سیاسین". هەروەها دەڵێ ئەگەر ئەحمەد كایا ئێستا لە ژیاندا بووایە، هەموو گۆرانییەكانی لەسەر ژن دەبوون. 

گولتان خەیاڵئۆغڵو (گولتان كایا) لەدایكبووی شاری ئامەدە، لەساڵی 1980 ژیانی هاوسەری لەگەڵ هونەرمەندی كوردی باكووری كوردستان ئەحمەد كایا پێكهێناوە. گولتان بۆ بەشداریكردن لە دووەمین كۆنفرانسی نەتەوەیی ژنانی كورد هاتبووە باشووری كوردستان، كە كۆنفرانسەكە لە رۆژی 16 تا 18ی مانگی رابردوو لە هەولێر بەڕێوەچوو.

بە بڕوای گوڵتان كایا ژنی كورد هەنگاوی باشی بڕیوە لە تێكەڵبوون لە سیاسەتدا، ئەو دەڵێ "ژنی كورد لە پشت پەردە هاتووەتە دەرەوە لە هەموو كایەكانی ژیان جێی گرتووە، بە تایبەتی لە سیاسەت". كایا پێیوایە ژنی كورد لە باكوور و باشووری كوردستان لە ژنی كورد لە رۆژئاوای توركیا لەڕووی سیاسییەوە هۆشیارترە "ژنی كورد لە رۆژئاوای توركیا بەبەراورد لەگەڵ باكووری كوردستان ئەوەندە سیاسی نییە. ژنی باكوور زیاتر بە ناسنامەی خۆی پەیوەستە، چونكە راستەوخۆ لەگەڵ مەینەتییەكان دەژی. ژنی باشووری كوردستان زۆر سیاسی بووە، لەنێو سیاسەتدا زۆر چالاكە".

گوڵتان و ئەحمەد 17 ساڵ پێكەوەبوون. ئەحمەد كایا بەهۆی گۆرانییەكانی دەستگیركرا و زیندانی كرا، بەڵام كاتێك مۆڵەتی وەرگرت بچێتەوە ماڵ، رایكرد و چووە فەرەنسا و لەوێ مافی پەنابەری وەرگرت. كایا لە 16/11/2000 بە جەڵتەی دڵ كۆچی دوایی كرد.

گوڵتان كایا دەڵێ هەرچەندە ئەحمەد بە جەستە لەلای ئەو نییە، بەڵام رۆحی كایا هەمیشە لەگەڵیەتی "دەچمە هەر شوێنێك رۆحی ئەحمەد لەگەڵ خۆم دەبەم، ئەمڕۆ لە هەولێرم پێموایە ئەحمەد لەگەڵ منە". 

خۆزگەی گوڵتان زیندووبوونەوەی ئەحمەدە بۆ چركەساتێكی كەم "تا بە چاوی خۆی ئەو هەموو دەستكەوتانە ببینێ كە ژنی كورد بەدەستی هێناون". گولتان كایا باسی ژیانی بێ ئەحمەد دەكات و دەڵێ "تام لە ژیانی خۆم وەرناگرم. ژیان بەبێ ئەحمەد بۆ من پڕە لە تەنیایی".

هونەرمەندی نێوداری كورد ئەحمەد كایا ئەگەرچی بەهۆی بەرهەم و گۆرانیەكانیەوە خۆشەویستی كۆمەڵگای تورك بوو، بەڵام گوتنی گۆرانییەك بە زمانی كوردی بەسبوو بۆ ئەوەی بكەوێتە بەر نەفرەتی ئەو كۆمەڵگەیە لەوكاتدا. 

ئەحمەد كایا ئەوەندە ئازاری بەدەست توركانەوە چەشت، كە لەسەرەمەرگدا داوایكرد تەرمەكەی نەبرێتەوە توركیا. 

ئەحمەد كایا لە ژیانیدا رووبەڕووی گرتن و زیندانیكردنی زۆر بووەتەوە، بەڵام هیچیان وەك شەوی 10ی شوباتی 1999 بێ بەزەیی نەبوون بەرامبەر ئەو هونەرمەندە. كاتێك لە هۆتێلی پرەنسیس خەڵاتی گۆرانیبێژی ساڵ لەلایەن رێكخراوی رۆژنامەنووسانی مەگەزین درایە كایا، ناوبراو بۆ وەرگرتنی خەڵاتەكە هاتە سەر شانۆ و گوتی "بۆ ئەو خەڵاتە سوپاسی رێكخراوی مافی مرۆڤ، دایكانی شەممە، هەموو خەڵكی توركیا دەكەم. لە چەند رۆژی داهاتوودا ئەلبومێكی نوێ بڵاودەكەمەوە، كە گۆرانییەكی كوردی تێدایە. دەزانم لێرە تەلەڤزیۆنی بوێر ئامادەن ئەو كلیپە پەخش بكەن، بەڵام ئەوەش دەزانم دواتر چۆن حیسابیان لەگەڵ دەكرێت". 

 هێشتا كایا قسەكانی تەواو نەكردبوو، كە رووبەڕووی كاردانەوە، جنێودان، سووكایەتی پێكردن و ملاك و چەنگاڵ تێگرتن بووەوە لەلایەن بەشێك لەو گۆرانیبێژ و رۆژنامەنووسە توركانەی لەوێ دانیشتبوون. دواتر بەبیانووی ئەوەی هاوكاری دارایی لەساڵی 1993 داوەتە PKK سكاڵای لەسەر تۆماركرا. ئەمانە و چەند رووداوێكی دیكەش ئەحمەد كایایان لە توركیا دەرپەڕاند. بەڵام دوای مردنی زۆربەی ئەوانەی لەوكاتدا هێرشیانكردە سەری پەشیمانبوونەوە. 

گولتان كایا پێیوایە قسەكان و هەڵوێستی ئەحمەد كایا رینیسانسێكی لەنێو لۆژیكی كۆمەڵگەی توركیدا بەرپاكرد "خۆزگە ئەو رینیساسە هەبووایە، بەڵام ئەحمەدمان لەدەست نەدابووایە. بەڵام هەر كۆمەڵگەیەك بۆ دەستەبەركردنی شتێك پێویستی بە قوربانییە. بۆ ئەوەی مەینەتییەكانی رابردوو دووبارە نەبنەوە، دەبێ دەست بەو دەستكەوتانەوە بگرین كە بەدەستمانهێناون. چونكە تەنیا بەوە دەتوانین رۆحی كایا و ئەوانەی دیكە بە زیندوویی بهێلینەوە".

 گولتان بەستنی كۆنفرانسی نەتەوەیی ژنانی كورد لە هەولێر وەك بەدیهاتنی خەونی هاوسەرەكەی دەبینێ "ئەگەر ئەحمەد زیندووبووایە هەموو گۆرانییەكانی لەبارەی ژن دەبوون. چونكە لای ئەو ژن پیرۆزبوو، بەڵام لۆژیكی ئەو بۆ ژن لۆژیكێكی فیمینیستی نەبوو".

 

پشتگیری BDP و AKP دەكات

 

هەرچەندە گولتان كایا كاری سیاسی ناكات، بەڵام خۆی وەك چالاكڤانێكی سیاسی لە قەڵەم دەدات و پشتگیری خۆی بۆ پارتی داد و گەشەپێدانی دەسەڵاتدار AKP و پارتی ئاشتی و دیموكراتی BDP رادەگەیێنێ "BDP داوای لێكردم خۆم بۆ پەرلەمانتاری كاندید بكەم، بەڵام بیرم لەوە نەكردووەتەوە لەنێو پەرلەمان سیاسەت بكەم. لە هەمانكاتدا ئەگەر پەرلەمانتاربم یان نا، دڵم لەگەڵ ئەو كەسانەیە كە سیاسەتێكی راست دەكەن".

بەڵام دەڵێ پشتگیری AKPیش دەكات، چونكە بە بڕوای گوڵتان "AKP كاری باشی بۆ دروستكردنی توركیایەكی دیموكراتخواز و ئازاد كردووە. بەهەمان شێوە پشتگیری BDP دەكەم چونكە دەنگی گەلێكی مەزڵومە". 

سەبارەت بە چارەسەری پرسی كورد لە توركیا گوڵتان كایا پێیوایە ئاڵۆزبوونی كێشەی كورد ئەوەندەی پەیوەندی بە سیستەمی توركیاوە هەیە، ئەوەندەش پەیوەندی بە پارتە سیاسییەكانەوە هەیە "چونكە سیستەمی توركیا لە دامەزراندنی كۆمارەوە لۆژیكێكی چەقبەستووی دروستكردووە. یەك جۆرە كەسێتی و بیركردنەوەی پێگەیاندووە".